Хүдөөгөө бодхоохо гэжэ Вячеслав Митыпов ходол эрмэлзэлжэл ябаа. Хүдөө ажахын һургуули дүүргэжэ тоонто нютагтаа бусаад, абатаяа хамта ажахыдаа хүдэлөө, һүүлдэнь аминдаа боложо гараа. Банкын урьһаламжын мүнгэн дээрэ трактор худалдажа абаа, тэрэнэйнь хахадые субсидиин аргаар гүрэн бусаагаа. Урма баяраар дүүрэжэ бусааһан мүнгэн дээрэнь пресс ба үбһэ һэгсэрэн хатаадаг ворошилка абаа һэмди гээд Вячеслав намтарайнгаа эхиниие дурсан хөөрэнэ. СВО-до 2022 ондо өөрын дураар ошоо. Шархатаһанай удаа гэртээ бусаад, энэ наһанайнгаа хэрэгые үргэлжэлүүлнэ. Нютагтаа гое юм аабдаа, тэнгэри, наран, агаар ондоо. Гэр бүлэмни хажуудам, дуратай ажал хэрэгээ хэнэб гээд ветеран хөөрэнэ.
Мүнөөдэр ажахыдань - 136 толгой эбэртэ бодо мал. Өөрын хэрэг эрхилэлгэдэнь «Агромативатор» гэһэн грант туһалаа. Үгтэһэн мүнгэндэнь фермер трактор ба казах сагаан толгойто үүлтэрэй үхэрнүүдые худалдан абаа. Бидэ нютагайнгаа тосхонһоо хүдөө гараха хүсэлэнтэйбди, мал шахалгын фермэ нээхэ хэргэтэй, 300 толгой хүрэтэр тоогоо бодхоохо. Малаа гаргаха, үйлэдэбэрилхэ талмай үгыбди, дүүрэн циклтэй болохо һанаан бии гээд ветеран хубаалдаба. Алексей Цыденов ба Владимир Павлов фермертэй харилсажа, саашанхи түсэб бодолнуудыень мэдэбэ, амжалта түгэс хүдэлжэ байһан хүдөөгэй зоной эршэ охеор урмашаба. Саашаа «Виста» гэһэн хүдөө эмхиин ажалтайнь танилсабад. Тус ажахы таряа ба кормовай ургамал тарижа үйлэдбэрилдэг, хажуугаарнь малаа үдхэдэг. Мяхан һалбариие шэлэжэ абаад ябуулнабди гээд эмхиин захирал Андрей Федотов хөөрэбэ. Ургуулһан хоолоор малаа шахаад, мяхаяа худалдадаг байна. Хамта дээрэ 4 мянган гектар газарые болбосоруулна, эбэртэ бодо малайнь тоо хадаа мянган толгойһоо дээшэ. Шэнэ оньһон техникын урагшатайень хэрэглэжэ, эршэтэйгээр хүгжэхэ хүсэлэнтэй. Малаа амидыгаар худалдадаг байна, залуу һүрэг ба томошье мал баруун, зүүн зүг руу адли тэгшээр худалдаанда гарадаг юм ха.
Фермернуудые ба хүдөө ажахын эмхинуудые дэмжэлгэ, СВО-гой ветерануудта туһалалга. Эдэ хэмжээнүүдэй аша туһаар арад зон тоонто нютагаа үргэн ажаллана, һанаа зоболтогүйгөөр ерээдүйгөө зохеоно.
